2022-ж. 5-апрель

Кыргыз Республикасынын Конститутциясынын 112-беренесине, Кыргыз Республикасынын «Борбордун статусу жөнүндө» мыйзамына ылайык, «Бишкекжылуулуктармак» ААКсы тарабынан жер алдындагы өтмөк аркылуу магистралдык жылуулук тармакты куруу себеби боюнча жабылган Лев Толстой жана 7-Апрель көчөлөрүнүн кесилишиндеги жер алдындагы өтмөктү калыбына келтирүү жана ачуу, жөө адамдардын коопсуздугун камсыздоо, ошондой эле, мындан ары Бишкек шаарынын билим берүү уюмдарынын окуучуларынын катышуусу менен жол-транспорттук кырсыктарды болтурбоо максатында, «Бишкекжылуулуктармак» ААКсынын 2021-жылда жасаган  иши жана 2022-жылга пландары тууралуу отчетун угуп жана талкуулап чыгып, Бишкек шаардык кеңеши

ТОКТОМ КЫЛАТ:

1. «Бишкекжылуулуктармак» ААКсынын 2021-жылда жасаган иши жана 2022-жылга пландары тууралуу отчету канаттандыраарлык эмес деп табылсын.

2. Бишкек шаарынын мэриясы, «Бишкекжылуулуктармак» ААКсы:

Лев Толстой жана 7-Апрель көчөлөрүнүн кесилишиндеги жер алдындагы өтмөктү калыбына келтирүү жана ачуу боюнча тийиштүү чараларды көрсүн;

Лев Толстой жана 7-Апрель көчөлөрүнүн кесилишиндеги жер алдындагы өтмөктү калыбына келтирүү «Бишкекжылуулуктармак» ААКсынын каражаттарынын эсебинен жүргүзсүн;

көрүлгөн чаралар тууралуу Бишкек шаардык кеңешинин турак жай коммуналдык чарба, отун-энерегетикалык комплекс, транспорт, коммуникациялар жана экология боюнча туруктуу комиссиясын маалымдасын.

3. Ушул токтомдун аткарылышын контролдоо Бишкек шаардык кеңешинин турак жай коммуналдык чарба, отун-энерегетикалык комплекс, транспорт, коммуникациялар жана экология боюнча туруктуу комиссиясына, турак жай коммуналдык чарба маселелерин тейлеген вице-мэрге жүктөлсүн.

Бишкек шаардык кенешинин төрагасы                        К. Конгантиев

Бишкек шаардык кеңешинин

2021-жылдын  20-декабрындагы № 18

ТОКТОМУ

Кыргыз Республикасынын Салыктык эмес кирешелер жөнүндө кодексинин 74-беренесине, Кыргыз Республикасынын «Жергиликтүү мамлекеттик администрация жана жергиликтүү өз алдынча башкаруу органдары жөнүндө» жана «Борбордун статусу жөнүндө» мыйзамдарына ылайык, Бишкек шаардык кеӊешинин ченемдик укуктук актыларын Кыргыз Республикасынын мыйзамдарына ылайык келтирүү максатында, Бишкек шаардык кеӊеши

ТОКТОМ КЫЛАТ:

1. Бишкек шаарынын таштандыларын ташып чыгаруу үчүн жыйымдын чени төмөнкүдөй бекитилсин:

1) жеке жана юридикалык жактар - ишкердик иш-аракеттер үчүн арналган имараттардын ээлери, анын ичинде курулушту же анын бир бөлүгүн ижарага берүүчүлөр үчүн - ар бир кызматкерден бир эсептик көрсөткүч өлчөмүндө;

2) мамлекеттик же муниципалдык менчикте турган курулуштар үчүн - ар бир кызматкерден бир эсептик көрсөткүч өлчөмүндө.

2. Бекитилген формага ылайык жыйымдын суммаларын төлөө жана тиешелүү эсептешүүлөрдү берүү төлөөчүлөр тарабынан жыл сайын үстүбүздөгү жылдын 1-апрелинен кеч эмес мөөнөттө жүргүзүлө тургандыгы белгиленсин.

Мамлекеттик же муниципалдык менчикте турган курулуштар үчүн жыйымды ошондой мүлк бекитилген уюмдар, ишканалар жана мекемелер төлөшөт.

3. Бишкек шаарынын мэриясы белгиленген тартипте жеке жактардан, ишкердик иш-аракеттер үчүн арналбаган турак жай курулуштардын ээлеринен Бишкек шаарынын таштандыларын ташып чыгаруу үчүн жыйымдын чени, аны башкаруу тартиби маселесин иштеп чыксын жана аны Бишкек шаардык кеӊештин бекитүүсүнө киргизсин.

4. Төмөнкүлөр күчүн жоготту деп табылсын:

Бишкек шаардык кеӊешинин 2009-жылдын 30-мартындагы № 54 «Бишкек шаарынын аймагынан таштандыларды ташып чыгаруу үчүн жыйымдардын ченин бекитүү жөнүндө» токтому;

Бишкек шаардык кеңешинин 2013-жылдын 2-апрелиндеги № 13 «Бишкек шаардык кеңештин 2009-жылдын 30-мартындагы № 54 «Бишкек шаарынын аймагынан таштандыларды ташып чыгаруу үчүн жыйымдардын ченин бекитүү жөнүндө» токтомуна өзгөртүү киргизүү тууралуу» токтому;

Бишкек шаардык кеңешинин 2010-жылдын 20-февралындагы № 149 «Бишкек шаардык кеңештин 2009-жылдын 30-мартындагы № 54 «Бишкек шаарынын аймагынан таштандыларды ташып чыгаруу ченин бекитүү жөнүндө» токтомуна өзгөртүүлөрдү киргизүү жөнүндө» токтомуна өзгөртүү киргизүү тууралуу» токтому;

Бишкек шаардык кеӊештин 2009-жылдын 29-декабрындагы № 135 «Бишкек шаарынын аймагынан таштандыларды ташып чыгаруу үчүн жыйымдарды эсептөөнүн жана төлөөнүн тартиби жөнүндө» жана «Бишкек шаарынын аймагында автотранспортторду токтотуу үчүн жыйымдарды эсептөөнүн жана төлөөнүн тартиби жөнүндө» жоболорду бекитүү жөнүндө» токтому.

5. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.

6. Ушул токтом расмий жарыяланган күндөн баштап күчүнө кирет.

7. Ушул токтомдун аткарылышын контролдоо Бишкек шаардык кеңешинин экономика, бюджет, финансы жана инвестиция боюнча туруктуу комиссиясына жана Бишкек шаарынын тейлеген вице-мэрине жүктөлсүн.

Бишкек шаардык кеӊешинин төрагасы                                                          К. Конгантиев

Бишкек шаардык кеңешинин

2021-жылдын  20-декабрындагы № 19

ТОКТОМУ

Кыргыз Республикасынын Бюджеттик кодексинин 115-беренесине ылайык, Бишкек шаардык кеңеши

ТОКТОМ КЫЛАТ:

1. Бишкек шаардык кеңешинин 2021-жылдын 26-февралындагы № 177 “2021-жылга Бишкек шаарынын бюджетин бекитүү жана 2022-2023-жылдарга болжолу жөнүндө” токтомуна төмөндөгүдөй өзгөртүүлөр киргизилсин:

1) 1-пункттагы «10 237 997,9», «5 410 859,4», «1 294 219,8», «1 229 131,1», «1 109 317,4», «1 194 470,2» деген цифралар тийиштүү «10 994 086,6», «6 266 581,9», «1 264 968,1», «1 192 581,7», «1 098 512,0», «1171 442,9» деген цифралар менен алмаштырылсын;

2) жогоруда көрсөтүлгөн токтомдун 1, 1-1, 1-2, 1-3-тиркемелери ушул токтомдун 1, 1-1, 1-2, 1-3-тиркемелерине ылайык редакцияда берилсин;

3) жогоруда көрсөтүлгөн токтомдун 2 жана 2-1-тиркемелери ушул токтомдун 2 жана 2-1-тиркемелерине ылайык редакцияда берилсин;

4)  жогоруда көрсөтүлгөн токтомдун 7-тиркемеси ушул токтомдун 3-тиркемесине ылайык редакцияда берилсин;

5) 24-пункттагы «260 921,3» деген цифра «260 703,8» деген цифра менен алмаштырылсын;

6) жогоруда көрсөтүлгөн токтомдун 8-тиркемеси ушул токтомдун 5-тиркемесине ылайык редакцияда берилсин.

2. Бюджеттик каражаттар боюнча чыгашалардын негизги топтору, кичи топтору боюнча өзгөртүлгөн көрсөткүчтөр ушул токтомдун 4-тиркемесине ылайык бекитилсин.

3. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын реестрине киргизүү үчүн Кыргыз Республикасынын Юстиция министрлигине жɵнɵтүлсүн.

4. Ушул токтомдун аткарылышын контролдоо Бишкек шаардык кеңешинин экономика, бюджет, финансы жана инвестициялар боюнча туруктуу комиссиясына жана Бишкек шаарынын тейлеген вице-мэрине жүктөлсүн.

Бишкек шаардык кеңешинин төрагасы                                                         К. Конгантиев

Тиркеме:

- токтомго бардык тиркемелер (xlxs. 168 Кб)

Бишкек шаардык кеңешинин

2021-жылдын  20-декабрындагы № 17

ТОКТОМУ

Бишкек шаарынын мэриясынын «Бишкекжылуулукэнерго» коммуналдык ишканасына керектөөчүлөрдү жылуулук энергиясы менен туруктуу жана үзгүлтүксүз камсыздоодо мамлекеттик колдоо көрсөтүү, жаратылыш газы менен жабдуучу - «Газпром Кыргызстан» жоопкерчилиги чектелген коомунун «Бишкекгаз» филиалынын алдындагы карызын төмөндөтүү максатында, Кыргыз Республикасынын «Жергиликтүү мамлекеттик администрация жана жергиликтүү өз алдынча башкаруу органдары жөнүндө» мыйзамынын 27-, 34- жана 39-беренелерине, Кыргыз Республикасынын «Мүлккө муниципалдык менчик жөнүндө» мыйзамынын 17-беренесине, Кыргыз Республикасынын Бюджеттик кодексинин 31- жана 78-беренелерине ылайык, Бишкек шаардык кеңеши

ТОКТОМ КЫЛАТ:

1. «Бишкекжылуулукэнерго» коммуналдык ишканасына төмөндөгүлөргө макулдук берилсин:

         «Бишкекжылуулукэнерго» коммуналдык ишканасынын кредитордук карызы боюнча «Газпром Кыргызстан» жоопкерчилиги чектелген коомунун «Бишкекгаз» филиалы менен  эсептешүүлөрдү жүргүзүү үчүн республикалык бюджеттен 150 000 000 (бир жүз элүү миллион) сом суммадагы бюджеттик кредит алууга;

         республикалык бюджеттен бюджеттик кредит алуу үчүн «Бишкексельмаш» отканасын күрөө катары коюуга.

         2. «Бишкекжылуулукэнерго» коммуналдык ишканасы:

         республикалык бюджеттен бюджеттик кредитти тартууга кредиттик келишимдин жана тийиштүү карыздык милдеттенменин кол коюу процедурасын белгиленген тартипте жүргүзсүн;

         ишкананын финансылык-чарбалык иш-аракеттеринин эсебинен  бюджеттик кредит боюнча пайыздарды төлөөнү белгиленген тартипте жүргүзсүн.

         3. Бишкек шаарынын мэриясы:

         Бишкек шаарынын бюджетин түзүүдө ушул токтомдун 1-пунктунда көрсөтүлгөн республикалык бюджеттен бюджеттик кредитти өз убагында жоюу үчүн «Бишкекжылуулукэнерго» коммуналдык ишканасын кошумча каржылоону карасын;

         кошумча каржылоону «Бишкекжылуулукэнерго» коммуналдык ишканасына  бөлүнүүчү субсидиялар боюнча карыздын суммасын азайтуу жолу менен кабыл алсын;

         Бишкек шаарынын мэриясынын «Бишкекжылуулукэнерго» коммуналдык ишканасы  тарабынан  ушул токтомдун 1-пунктунда көрсөтүлгөн республикалык бюджеттен бюджеттик  кредиттин максаттуу пайдаланылышын жана өз убагында кайтарылышын контролдоону камсыздасын;

ушул кредитти трансферттердин эсебинен жабууну иштеп чыксын;

газ менен иштеген отканаларга эсептегичтерди коюу маселесин иштеп чыксын.

4. Ушул токтом каттоодон ѳткѳрүлсүн жана Кыргыз Республикасынын ченемдик укуктук актыларынын Мамлекеттик реестрине киргизүү үчүн Кыргыз Республикасынын Юстиция министрлигине жѳнѳтүлсүн.

         5. Ушул токтомдун аткарылышын контролдоо Бишкек шаардык кеңешинин экономика, бюджет, финансы жана инвестициялар боюнча туруктуу комиссиясына, Бишкек шаарынын биринчи вице-мэри М. Ш. Сазыкуловго жана Бишкек шаарынын вице-мэри М. К. Байгончоковго жүктөлсүн.

         6. Ушул токтом расмий жарыяланган күндөн тартып күчүнө кирет.

Бишкек шаардык кеңешинин төрагасы                                       К. Конгантиев