14.04.2025 -ж. жарыяланды

БИШКЕК ШААРДЫК КЕҢЕШИНИН

ТОКТОМУ

2025-жылдын 27-мартындагы № 19

 «Бишкек шаарынын ардактуу жараны» наамын ыйгаруу жөнүндө

Бишкек шаардык кеңешинин 2005-жылдын 10-октябрындагы №111 «Бишкек шаарынын ардактуу жараны жөнүндө» жобону бекитүү жөнүндө» токтомуна ылайык, Бишкек шаарынын жергиликтүү жамаатынын сыйлыктары боюнча комиссиясынын  2025-жылдын 26-февралындагы №2 протоколунун негизинде, Бишкек шаардык кеңеши

ТОКТОМ КЫЛАТ:

1. 2024-жыл үчүн «Бишкек шаарынын ардактуу жараны» наамы төмөнкү жарандарга ыйгарылсын:

• Аскаров Алик Бакеевич - Кыргыз Республикасынын ардактуу авиатору;
• Бактыбеков Алымбек Бактыбекович - Бишкек шаардык кеңешинин үч чакырылышынын депутаты, Бишкек шаардык кеңешинин турак жай-коммуналдык чарба, отун-энергетика комплекси, транспорт, коммуникация жана экология боюнча туруктуу комиссиясынын төрагасы;
• Сурапбаев Таалайбек Каримжанович - Бишкек шаардык кеңешинин үч чакырылышынын депутаты, Бишкек шаардык кеңешинин  Бишкек шаарына жаңы кошулган аймактарды жакшыртуу маселелери боюнча туруктуу комиссиясынын төрагасы;
• Досиев Эдик Шарипович - Бишкек шаардык кеңешинин үч чакырылышынын депутаты;
• Чепеев Калыбек Чепеевич - Бишкек шаардык кеңешинин үч чакырылышынын депутаты;
• Абдиев Бактыбек Кемелович - Кыргыз Республикасынын жергиликтүү өз алдынча башкаруусуна эмгек сиңирген кызматкери, Бишкек шаардык кеңешинин XXVII, XXVIII чакырылыштарынын депутаты;
• Досалиев Эльмир Акуналыевич - Бишкек шаардык кеңешинин үч чакырылышынын депутаты;
• Маматалиев Абдырахман Мадакимович - Кыргыз Республикасынын мамлекеттик кызматына эмгек сиңирген кызматкери, Кыргыз Республикасынын мамлекеттик кызматынын экинчи класстагы мамлекеттик кеңешчиси;
• Исаков Марат Абдымажимович - Кыргыз Республикасынын мамлекеттик кызматынын үчүнчү класстагы мамлекеттик кеңешчиси, Кыргыз Республикасынын билим берүүсүнүн отличниги, Кыргыз Республикасынын архитекторлор союзунун ардактуу мүчөсү;
• Рыскулов Эмиль Рысалиевич - Бишкек шаардык кеңешинин XXIV чакырылышынын депутаты, Бажы кызматынын отличниги;
• Давлянов Дамирбек Тайырбекович - милициянын полковниги, укук коргоо органдарынын пенсионери;
• Урманбетов Кыялбек - Кыргыз Республикасынын эл акыны;
• Сырдыбаев Улан Муратбаевич - «Нурсан» ЖЧКсынын башкы директору.

2. Бишкек шаарынын мэриясы Бишкек шаардык кеңештин 2007-жылдын        19-мартындагы № 311 «Бишкек шаарынын ардактуу жаранынын Белгисинин, Грамотасынын, Күбөлүгүнүн жоболорун жана жазууларын жана Бишкек шаарынын ардактуу жаранынын Китебин бекитүү жөнүндө» токтомуна ылайык, бул наамга татыктуу болгон адамдарга тапшыруу үчүн Бишкек шаарынын ардактуу жаранынын белгилерин, ардак грамоталарын, Бишкек шаарынын ардактуу жаранынын күбөлүктөрүн даярдоону камсыз кылсын.

3. Ушул токтом жарыяланган күндөн тартып күчүнө кирет. 

4. Ушул токтомдун аткарылышын контролдоону өзүмө калтырам.

Бишкек шаардык кеңешинин

төрагасы                                                                                           Б. Усеналиев

14.04.2025 -ж. жарыяланды

БИШКЕК ШААРДЫК КЕҢЕШИНИН

ТОКТОМУ

2025-жылдын 27-мартындагы № 16

Бишкек шаардык кеңешинин 2024-жылдын 23-декабрындагы № 7 «Бишкек шаардык кеңешинин XXIX чакырылышынын туруктуу комиссияларынын төрагаларын жана төрагаларынын орун басарларын бекитүү жөнүндө» токтомунун тиркемесине өзгөртүүлөрдү киргизүү тууралуу

            «Жергиликтүү мамлекеттик администрация жана жергиликтүү өз алдынча башкаруу органдары жөнүндө» Кыргыз Республикасынын Мыйзамын, Бишкек шаардык кеңешинин регламентин жетекчиликке алып, Бишкек шаардык кеңешинин жергиликтүү өз алдынча башкаруу жана коомдук уюмдар менен иштөө боюнча туруктуу комиссиясынын чечимине ылайык, Бишкек шаардык кеңеши

 ТОКТОМ КЫЛАТ:

1. Лира Акунова Бишкек шаардык кеңешинин жергиликтүү өз алдынча башкаруу жана коомдук уюмдар менен иштөө боюнча туруктуу комиссиясынын төрагасы болуп бекитилсин.

2. 2024-жылдын 23-декабрындагы №7 «Бишкек шаардык кеңешинин XXIX чакырылышынын туруктуу комиссияларынын төрагаларын жана төрагаларынын орун басарларын бекитүү жөнүндө» токтомунун тиркемесине төмөнкүдөй өзгөртүү киргизилсин:

6-пункттун 2-абзацындагы «Аматов Рысбай Аматович» деген сөздөр «Акунова Лира» деген сөздөргө алмаштырылсын.

3. Бул токтомдун аткарылышын контролдоону өзүмө калтырам.

Төрага                                                                                                   Б.Усеналиев

14.04.2025 -ж. жарыяланды

БИШКЕК ШААРДЫК КЕҢЕШИНИН

ТОКТОМУ

2025-жылдын 27-мартындагы № 18

Бишкек шаардык кеңешинин мамлекеттик менчик

объекттерин муниципалдык менчикке кабыл алууга

макулдук берүү жөнүндө ченем жаратуу ыйгарым укуктарын

 Бишкек шаарынын мэриясына өткөрүп берүү тууралуу

Жергиликтүү маанидеги маселелерди чечүүнүн ыкчамдыгын жогорулатуу максатында, «Мүлккө муниципалдык менчик жөнүндө», «Кыргыз Республикасынын ченемдик укуктук актылары жөнүндө»,  «Жергиликтүү мамлекеттик администрация жана жергиликтүү өз алдынча башкаруу органдары жөнүндө» Кыргыз Республикасынын мыйзамдарына  ылайык Бишкек шаардык кеңеши

ТОКТОМ КЫЛАТ:

1. Бишкек шаардык кеңешинин мамлекеттик менчик объекттерин муниципалдык менчикке кабыл алууга макулдук берүү жөнүндө ченем жаратуу ыйгарым укуктары Бишкек шаарынын мэриясына өткөрүлүп берилсин.
2. Ушул токтомдун 1-пунктунда көрсөтүлгөн ченем жаратуу ыйгарым укуктары  ушул токтом кабыл алынган күндөн тартып бир жылдын ичинде колдонулары белгиленсин.
3. Бишкек шаарынын мэриясы өткөрүлүп берилген ыйгарым укуктардын алкагында карызы жок, түйшүккө салынбаган (чектелбеген) жана соттук талаштын жүйөсү болбогон мамлекеттик менчик объекттерин муниципалдык менчикке кабыл алсын. Карызы бар, түйшүккө салынган (чектелген) жана соттук талаштын жүйөсү болгон объекттер боюнча маселелер Бишкек шаардык кеңешинин кароосуна Кыргыз Республикасынын мыйзамдарына ылайык киргизилсин.
4. Бишкек шаарынын мэриясы Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясына муниципалдык менчикке кабыл алынган мамлекеттик менчик объекттери боюнча маалыматты квартал сайын берип турсун.
5. Бишкек шаарынын мэриясы белгиленген тартипте ушул токтомдон келип чыккан тийиштүү чараларды көрсүн.
6. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.
7. Ушул токтомдун аткарылышын контролдоо Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясына, регламент, этика, укуктук маселелер жана укук тартиби боюнча туруктуу комиссиясына жана Бишкек шаарынын мэрине (А.Дж. Джунушалиев) жүктөлсүн.
8. Ушул токтом расмий жарыяланган күндөн тартып күчүнө кирет.

Бишкек шаардык кеңешинин

төрагасы                                                                                              Б. Усеналиев

14.04.2025 -ж. жарыяланды

БИШКЕК ШААРДЫК КЕҢЕШИНИН

ТОКТОМУ

2025-жылдын 27-мартындагы № 21

«Бишкек жылуулук электр борбору» муниципалдык

 ишканасына республикалык бюджеттен бюджеттик

 кредит алууга макулдук берүү жөнүндө

«Бишкек жылуулук электр борбору» муниципалдык ишканасына 2024-2025-жылдардын күз-кыш мезгилинде Бишкек шаарынын керектөөчүлөрүн жылуулук жана электр энергиясы менен туруктуу үзгүлтүксүз жабдууну даярдоодо жана камсыз кылууда мамлекеттик колдоо көрсөтүү максатында, «Жергиликтүү мамлекеттик администрациясы жана жергиликтүү өз алдынча башкаруу органдары жөнүндө» Кыргыз Республикасынын мыйзамынын 27-, 34- жана                  39-беренелерине, «Мүлккө муниципалдык менчик жөнүндө» Кыргыз Республикасынын Мыйзамынын 17-беренесине, Кыргыз Республикасынын Бюджеттик кодексинин 31- жана 78-беренелерине ылайык, Бишкек шаардык кеңеши

ТОКТОМ КЫЛАТ:

1. «Бишкек жылуулук электр борбору» муниципалдык ишканасына төмөнкүлөргө макулдук берилсин:

- контрагенттер менен кредиттик карыздар боюнча эсептешүүлөрдү жүргүзүү үчүн республикалык бюджеттен 1 000 000 000,0 (бир миллиард) сом суммасында бюджеттик кредит алууга;

- республикалык бюджеттен бюджеттик кредит алуу үчүн «Бишкек жылуулук электр борбору» муниципалдык ишканасынын мүлкүн күрөө катары коюуга.

2.  «Бишкек жылуулук электр борбору» муниципалдык ишканасы белгиленген тартипте:

- республикалык бюджеттен бюджеттик кредитти тартууга кредиттик келишимге жана тийиштүү карыздык милдеттенмеге кол коюу жол-жобосун жүргүзсүн;

- ишкананын финансылык-чарбалык иш-аракеттеринин эсебинен бюджеттик кредитти жана пайыздарды төлөөнү жүргүзсүн.

3. Бишкек шаарынын мэриясы:

- «Бишкек жылуулук электр борбору» муниципалдык ишканасынын балансында турган мүлк менен жогоруда көрсөтүлгөн бюджеттик кредитти күрөөлүк камсыздоо үчүн Кыргыз Республикасынын мыйзамдарына ылайык бардык тийиштүү иш-чараларды жүргүзсүн;

- Бишкек шаарынын мэриясынын «Бишкек жылуулук электр борбору» муниципалдык ишканасы тарабынан ушул токтомдун                   1-пунктунда көрсөтүлгөн республикалык бюджеттен бюджеттик кредиттин максаттуу пайдаланылышын жана өз убагында кайтарылышын контролдоону камсыздасын.

4. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын Мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.

5. Ушул токтомдун аткарылышын контролдоо Бишкек шаардык кеңешинин экономика, бюджет, финансы жана инвестициялар боюнча туруктуу комиссиясына, муниципалдык менчик, жер маселелери, шаар куруу жана архитектура боюнча туруктуу комиссиясына жана Бишкек шаарынын мэрине (А.Дж. Джунушалиев) жүктөлсүн.

6. Ушул токтом расмий жарыяланган күндөн тартып күчүнө кирет.

Бишкек шаарынын

шаардык кеңешинин төрагасы                                              Б. Усеналиев