30.04.2024-ж. жарыяланды

БИШКЕК ШААРДЫК КЕҢЕШИНИН
ТОКТОМУ

2024-жыл 25-апрель № 119

Мамлекеттик менчиктин объекттерин муниципалдык менчикке кабыл алууга макулдук берүү жөнүндө

Бишкек шаарындагы билим берүү мекемелеринин балдарын жана өспүрүмдөрүн зарыл болгон спорттук инфраструктура менен камсыздоо, ошондой эле жергиликтүү маанидеги маселелерди натыйжалуу чечүү максатында, Кыргыз Республикасынын “Мүлккө муниципалдык менчик жөнүндө”  мыйзамынын 6-беренесине, Кыргыз Республикасынын “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамынын 34-беренесине ылайык, Бишкек шаардык кеңеши

ТОКТОМ КЫЛАТ:

1. Мурда Кыргыз Республикасынын Билим берүү жана илим министрлигине караштуу “Эмгек резерви” республикалык дене тарбия жана спорт борборунун пайдалануусунда турган жер участокторду (идентификациялык коддору 1-03-03-0024-0732; 1-03-03-0024-0733; 1-03-03-0024-0734; 1-03-03-0024-0735; 1-03-03-0024-0736) имараттары жана курулмалары менен Бишкек шаарынын муниципалдык менчигине акысыз кабыл алууга макулдук берилсин.

2. Бишкек шаарынын мэриясы белгиленген тартипте ушул токтомдон келип чыккан зарыл чараларды көрсүн жана жыйынтыгы боюнча Бишкек шаардык кеңешинин сессиясынын кароосуна киргизсин.

3. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.

4. Ушул токтомдун аткарылышын контролдоо Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясына жана Бишкек шаарынын мэрине (А. Дж. Джунушалиев) жүктөлсүн.

Төрага                                                                                     К. Конгантиев

26.04.2024-ж. жарыяланды

БИШКЕК ШААРДЫК КЕҢЕШИНИН
ТОКТОМУ

2024-жыл 25-апрель № 128

“Бишкек шаарынын ардактуу жараны” наамын ыйгаруу жөнүндө        

         Бишкек шаардык кеңешинин 2005-жылдын 10-октябрындагы № 111 токтому менен бекитилген "Бишкек шаарынын ардактуу жараны жөнүндө" жобого ылайык, 2024-жылдын 20-мартындагы № 2 жана 2024-жылдын 25-мартындагы № 3 протоколдорунун негизинде, Бишкек шаардык кеңеши

ТОКТОМ КЫЛАТ:

1. 2023-жыл үчүн "Бишкек шаарынын ардактуу жараны" наамы төмөнкү жарандарга ыйгарылсын:

Раимжанов Абдухалим – илимине эмгек сиңирген ишмери, КР УИАнын мүчөсү, профессор;

Самаков Карганбек Садыкович – коомдук ишмер;

Калыков Мийзамидин Абдырахманович – Бишкек шаардык кеңешинин депутаты;

Кайыпов Сулайман Турдуевич – илимдин эмгек сиңирген ишмери, КР УИАнын физиология институтунун башкы илимий кызматкери;

Джайчибеков Бекбосун Карабекович – Кыргыз Республикасынын эл сүрөтчүсү;  

Керимкулова Светлана Мусаевна – Кыргыз Республикасынын эмгек сиңирген мугалими;

Кайыпов Аманбай – Бишкек шаардык кеңешинин үч чакырылышынын депутаты жана XXV чакырылыштагы Бишкек шаардык кеңешинин төрагасы (2012-ж.);

Бейшеев Мелис – Кыргыз Республикасынын эмгек сиңирген  экономисти, Бишкек шаарынын согуштун, эмгектин, куралдуу күчтөрүнүн жана укук коргоо органдарынын ардагерлеринин жана ооруктун эмгекчилеринин кеңешинин төрагасы;

Досалиев Акуналы Атамырзаевич – Кыргыз Республикасынын эмгек сиңирген куруучусу.

2. Бишкек шаарынын мэриясы Бишкек шаардык кеңештин 2007-жылдын 19-мартындагы № 311 "Бишкек шаарынын ардактуу жаранынын Белгисинин, Грамотасынын, Күбөлүгүнүн жоболорун жана жазууларын жана Бишкек шаарынын ардактуу жаранынын Китебин бекитүү жөнүндө" токтомуна ылайык, бул наамга татыктуу болгон адамдарга тапшыруу үчүн Бишкек шаарынын ардактуу жаранынын белгилерин, ардак грамоталарын, Бишкек шаарынын ардактуу жаранынын күбөлүктөрүн даярдоону камсыз кылсын.

3. Ушул токтомдун аткарылышын контролдоону өзүмө калтырам.

Бишкек шаардык
кеңешинин төрагасы                                                         К. Конгантиев

26.04.2024-ж. жарыяланды

БИШКЕК ШААРДЫК КЕҢЕШИНИН
ТОКТОМУ

2024-жыл 25-апрель № 124

Пилоттук режимде Бишкек шаарында административдик-аймактык реформа жүргүзүүнүн алкагында ыйгарым укуктарды өткөрүп берүү жөнүндө

Кыргыз Республикасынын Президентинин 2023-жылдын 29-декабрындагы № 370 «Кыргыз Республикасынын айыл аймактарынын жана шаарларынын деңгээлинде пилоттук режимде административдик-аймактык реформа жүргүзүү жөнүндө» Жарлыгын, Кыргыз Республикасынын Министрлер Кабинетинин 2024-жылдын 7-февралындагы № 52 «Пилоттук режимде административдик-аймактык реформа жүргүзүү мезгилинде Кыргыз Республикасынын жергиликтүү өз алдынча башкаруусунун аткаруу органдарынын ишин уюштуруу жөнүндө» токтомун ишке ашыруу максатында, «Кыргыз Республикасынын ченемдик укуктук актылары жөнүндө» Кыргыз Республикасынын Мыйзамынын 8-беренесине, Кыргыз Республикасынын Президентинин 2024-жылдын 7-февралындагы № 24 «Пилоттук режимде жүргүзүлүп жаткан административдик-аймактык реформанын алкагында жергиликтүү кеңештердин иши жөнүндө убактылуу жобону бекитүү тууралуу» Жарлыгына ылайык, Бишкек шаардык кеңеши

ТОКТОМ КЫЛАТ:

1. Пилоттук режимде Бишкек шаарында административдик-аймактык реформа жүргүзүүнүн алкагында Кыргыз Республикасынын айыл аймактарынын жана шаарларынын деңгээлинде административдик-аймактык реформанын жыйынтыктарын мыйзам менен бекемдөөгө чейин  Бишкек шаарынын мэрине төмөнкүлөрдү бекитүү ыйгарым укуктары өткөрүлүп бериле тургандыгы белгиленсин:

-   2024-жылга Бишкек шаарынын бюджетин жана 2025-2026-жылдарга болжолун;

-   керектөө ченемдерин жана Бишкек шаарынын жергиликтүү өз алдынча башкаруу органдары тарабынан көрсөтүлүүчү коммуналдык кызматтарга жана товарларга тарифтерди;

-   жүргүнчүлөрдү жалпы пайдалануудагы автомобил транспорту менен ташууга тарифтерди;

-   муниципалдык аймактык башкармалыктары тарабынан тейленүүчү аймактардын чек араларын.

2. Бишкек шаарынын мэриясы белгиленген тартипте ушул токтомдон келип чыккан зарыл чараларды көрсүн.

3. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.

4. Ушул токтомдун аткарылышын контролдоо Бишкек шаардык кеңешинин регламент, этика, укуктук маселелер жана укук тартиби боюнча туруктуу комиссиясына жана Бишкек шаарынын мэрине А.Дж.Джунушалиевге жүктөлсүн.

5. Ушул токтом кабыл алынган күндөн тартып күчүнө кирет.

Бишкек шаардык
кеңешинин төрагасы                                                К.Конгантиев

19.03.2024-ж. жарыяланды

БИШКЕК ШААРДЫК КЕҢЕШИНИН
ТОКТОМУ

2024-жыл 4-март № 115

Бишкек шаардык кеңешинин 2020-жылдын 14-январындагы №140 “Жаңы мөөнөткө ижара келишимин түзүү, Бишкек шаарынын муниципалдык менчигинде турган жер участокторго убактылуу пайдалануу укуктарын өткөрүп берүүгө жана токтотууга макулдук берүү тартиби жөнүндө жобону бекитүү тууралуу” токтомуна өзгөртүүлөрдү киргизүү жөнүндө

Кыргыз Республикасынын Жер кодексине, “Жергиликтүү мамлекеттик администрация жана жергиликтүү өз алдынча башкаруу органдары жөнүндө” жана “Мүлккө муниципалдык менчик жөнүндө” Кыргыз Республикасынын мыйзамдарына ылайык, жер пайдалануу чөйрөсүндөгү колдонуудагы мыйзамдарды өркүндөтүү максатында, Бишкек шаардык кеңеши

ТОКТОМ КЫЛАТ:

1. Бишкек шаардык кеңешинин 2020-жылдын 14-январындагы №140 токтому менен бекитилген “Жаңы мөөнөткө ижара келишимин түзүү, Бишкек шаарынын муниципалдык менчигинде турган жер участокторго убактылуу пайдалануу укуктарын өткөрүп берүүгө жана токтотууга макулдук берүү тартиби жөнүндө” жобого төмөндөгүдөй өзгөртүүлөр киргизилсин:

а) 14-пункт төмөндөгүдөй редакцияда берилсин:

“14. Ыйгарым укуктуу орган ушул жобонун 11-13-пункттарында көрсөтүлгөн ыйгарым укуктуу органдардан тийиштүү документтер келип түшкөн учурдан тартып 3 жумуш күндүн ичинде ижара төлөмүнүн наркын көбөйтүү менен жер участогун пайдалануу укугунун мөөнөттөрүн узартуу жөнүндө буйрук чыгарат:

1) эгерде бузуулар, четтөөлөр жана чектөөлөр жок болсо - 10 пайызга, анын ичинде кандайдыр бир объекттерди долбоорлоо жана куруу, ошондой эле жайгаштыруу каралбаган жер участокторго;

2) эгерде жер участогуна курулуш түшпөсө, бирок архитектуралык-пландоо шарттары бар жана ижара төлөмдөрү боюнча карызы жана башка бузуулар жок болсо - 30 пайызга;

3) эгерде жер участогуна курулуш түшпөсө, уруксат документтери жок, бирок ошону менен бирге ижара төлөмдөрү боюнча карызы жана башка бузуулар жок болсо - 100 пайызга.

Мөөнөтү аяктаган ижара келишими менен жер участогун пайдалануу укугу ушундай эле мөөнөткө узартылат.”;

б) 17-пункттагы “комиссиянын чечиминин негизинде” деген сөздөр алынып салынсын;

в) 23-пункттагы “жөнөкөй шериктештик (бирдиктүү иш-аракеттер) келишимин жана” деген сөздөр алып салынсын;

г) 29-пункт төмөндөгүдөй редакцияда берилсин:

“29. Үлүштүк курулуш келишимин түзүүгө макулдук жеке ишкер болуп саналган ижарачыга - жеке жакка; пландаштырылган иш-аракет ижара келишиминин шарттарына ылайык келгенде, коммерциялык уюм болуп саналган ижарачыга - юридикалык жакка берилет.

Үлүштүк курулуш келишимин түзүүгө макулдук жер участогун пайдалануу укугун үчүнчү жакка өткөрүп берүү үчүн негиз болуп саналбайт жана жер пайдалануу жана курулуш боюнча ыйгарым укуктуу органдын кароосун талап кылбастан арыз катталган учурдан тартып 3 жумуш күндүн ичинде ижарачыга берилет.”;

д) 30-пункттагы “Жөнөкөй шериктештик (биргелешкен иш) келишимин же” деген сөздөр алып салынсын;

е) 35-пункт төмөндөгүдөй редакцияда берилсин:

“35. Төмөндөгүлөргө макулдук берүүгө жол берилбейт:

жер участокторун бириктирүүгө;

жер участогуна укукту чарбалык шериктештиктердин жана коомдордун уставдык капиталына салым же өндүрүштүк кооперативдерге пайлык төгүм катары киргизүү үчүн.”.

2. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын юстиция министрлигине жөнөтүлсүн.

3. Ушул токтомдун аткарылышын контролдоо Бишкек шаардык кеңешинин муниципалдык менчик, жер маселелер, шаар куруу жана архитектура боюнча туруктуу комиссиясына жана Бишкек шаарынын мэрине (А. Дж. Джунушалиев) жүктөлсүн.

Бишкек шаардык
кеңешинин төрагасы                                                         К. Конгантиев